BUTUAN CITY – Patay ang usa ka Pulis nga mi-responde sa gikatahong armadong lalaki sa may P. Del Pilar, Barangay Población, Danao CIty, Cebu bandang alas 12:20 ang takna sa udto karong adlawa, Hunyo 27, 2025.
Giila ang maong Police nga si Patrolman Mark Gomer Ornopia Sr., sakop sa Danao City Police Station. Nadala pa ang maong biktima sa balay-tambalanan, apan nakabsan ra gilayon kini sa iyahang kinabuhil.
Subay sa inisyal nga impormasyon sa Cebu Police Provincial Office kun CPPO, nangilog matud pa og pusil ang suspek sa guwardya sa usa ka establisamento hinungdan nga nanawag sila og tabang sa mga kapulisan.
Daling nakaabot ang biktima nga si Ornopia uban sa mga personahe sa Bureau of Jail Management and Penology kun BJMP sa lugar.
Apan dihang gigukod nila ang suspetsado, gi-unhan matud pa og pabuto sa suspek ang kapulisan gamit ang armas nga nailog niini sa guwardiya.
Mibawos usab sa pagpusil ang mga personahe sa BJMP ngadto sa suspetsado kansa miresulta sa pagkaigo sa lawas niini.
