BUTUAN CITY – Wala’y lipod-lipod nga gipanganlan sa contractor nga si Pacifico ‘Curlee’ Discaya atol sa Senate Blue Ribbon Committee hearing kaganina ang dili mu-ubos sa 20 ka mga kongresista ug pipila ka mga opisyales sa Department of Public Works and Highways kon DPWH nga nalambigit sa dinagko nga kickback scheme kansa gikutay ngadto sa mga flood control projects.
Sa gipanumpaang pamahayag sa magti-ayon, gibutyag nilang gipugos ang mga contractors pagpabayad og 10% ngadto sa 25% nga komisyon in cash, aron masiguro ang pagpatuman sa mga proyekto kondiin ang binayranay, nadokumento matud pa gamit ang mga vouchers ug ledgers, nga nagdetalye sa mga petsa ug sa mga midawat niini.
Gisultihan matud pa sila sa mga kongresista nga kung gusto nilang makakuha og mga proyekto, kinahanglan nilang bayran ang mga magbabalaud.
Sa sinugdanan, wala matud pa sila musanong apan kanunay nga pangitaan og bikil ang ilang mga transaksyon hangtud nga ma-ut ot na ang ilang panudlanan rason nga napugos sila pagsunod sa maong modus.
Apil sa mga magbabalaud sila kanhi House Appropriations Committee chairman Elizalde Co ug House Speaker Martin Romualdez ug ang uban mga DPWH officials na.
