BUTUAN CITY – Padayon pang gikumpirma sa Filipino community sa Miami-Dade sa Florida, USA ang gika-ingong duna’y duha ka mga Pinoy nga nadamay sa nahugmak nga 12-andanas nga apartment building.
Sa eksklusibong interview sa Bombo Radyo Butuan, gipadayag ni Bombo Surfside international correspondent Glenda Sebastian -Nogodula nga bisan og duna’y na-mention sa ilang grupo sa mga Pinoy sa Florida nga duna’y duha ka Pinoy nga apil sa mga biktima apan wala pa’y gipagawas nga ilang mga pangalan.
Base sa iyang nasayran, kadaghanan sa mga casualties nga bakasyunistang Jewish base na usab sa mga impormasyong ilang nakuha gikan sa Jewish community kondiin usa ka Hudiyo ang iyang bana.
Base matud pa sa ilang nasayran, duna na’y isyu ang maong dakbalay niadto pang mi-aging mga katu-igan kalabot sa mga requirements alang sa pagpabarog niini.
Silang tanan, padayon matud pang nag-update sa nagpadayong search and rescue operations ilabina nga apil siya ug ang iyang pamilyang Jewish, blangko pa kung duna ba sila’y mga higalang apil sa mga na-missing ilabina nga gisira na ang area diin natigayon ang pagkahugmak sa dakbalay aron dili mabara ang operasyon.
Padayon usab nga gipaningkamutan sa state government nga marekober ang tanang mga missing.
Gawas sa ayudang gihatag sa state government ngadto sa kabanay sa mga biktimang natumbok nang patay ug mga naluwas, duna usa’y nagkada-iyang Jewish organizations nga nagdonar na sa gikinahanglan sa mga biktima ug sa ilang mga kabanay.
Samtang gisugdan na usab ang imbestigasyon kalabot sa maong hitabo subay na usab sa mitumaw nga mga isyu.
