BUTUAN CITY – Gikabalaka ni Akbayan Rep. Tom Villarin nga mabungkag ang justice system sa nasud tungod sa nahitabong pagpamulitika sa pagpalagpot kang Chief Justice Maria Lourdes Sereno.
Kini ang reaksiyun sa magbabalaod human sa lakang sa mga judges nga nanawagang mag-resign na lang ang Chief Justice.
Sumala ni Villarin sa eksklusibong pakighinabi ning sibyahan, na-pressure ang mga judges nga mohimo sa maong lakang nga usa matud pa ka unconstitutional.
Pasabot pa sa opisyal nga na-pressure ang maong mga judges tungod kay kung dili mosuporta sa kasamtangang administrasyon, dili man kini ma-promote o kaha mabalhin sa ubang korte.
Gipamugos nalang ni Cong. Villarin nga impeachment court lang ang makapahawa sa usa ka chief justice. Ang kasamtangang panghitabo nagpakita lang sa pagpanamastamas sa justice system sa nasud nga delikadong mabungkag kung padayon ang pagpamulitika.
Gikatingala nalang niini kung nganung dili nalang hulaton ang pag-abante sa impeachment complaint batuk kang Sereno.
Ang maayong buhataon sa mga empleyado sa korte nga dunay mulo kang Sereno, ipaabot nila kini sa acting chief justice.
Samtang aminado ang opisyal nga numbers game ang mahitabo sa impeachment complaint ug dunay gitawag nga supermajority.
Tungod niini, nanghinaot nalang kini nga hatagan ug oras ang misupak nga makapasibaw sa ilang posisyon isip kabahin sa demokrasya sa nasud.
