BUTUAN CITY – Napa-abot na sa opisina ni Atty. Amado Valdez, ang Social Security System kon SSS Chairman, ang reklamo sa pipila ka mga pensioners ning dakbayan sa Butuan nga wala pa nakadawat sa usa ka libo ka pesos nga dugang pension.
Sigon ni Paul Flaviano, Public Information Officer sa SSS-Butuan, gelayon nilang giduso ngadto sa pension administrator ang reklamo sa mga pensioners diin dunay pribadong bangko nga wala pa nakahatag ug dugang usa ka libo ka pesos sa ilang mga kliyenteng pensioners sa rason nga wala pay na-download nga kantidad alang niini sa ilang bangko.
Pagbutyag pa ni Flaviano, gimanduan na usab sila ni Valdez sa pag-validate sa reklamo nga posibling basehan sa silot nga suspension o kaha kanselasyun isip accredited bank.
Gipasabot pa sa opisyal nga centralized ang pag-down load sa 2.04 bilyones pesos alang sa dugang pension hinungdang otomatik kining madawat sa tanang pensioners.
Duda nalang ni Flaviano nga basin nabag-ohan lang ang sistema sa maong bangko ilabina kay dili kini regular nga paghatag sa pension.
Una nang gipaabot ning sibyahan sa wala magpailang pensioner ang ilang kadismaya human wala makadawat sa usa ka libo ka pesos nga dugang pension niadtong Marso 3 nga para sa bulan sa Enero ning tuig.
Sigon pa niini, naglibug siya sa rason sa usa ka pribadong bangko, sa wala pa paghatag ug dugang usa ka libo ka pesos ngadto sa ilang mga pensionado.
Nagbahad nalang kini nga modool sa mga sektor nga dunay kahibalo sa ilang reklamo.
