BUTUAN CITY – Gipataas ang red “flag of revenge” sa ibabaw sa dome sa Jamkaran Mosque sa Qom, Iran, isip simbolo sa kasukod og pagpangeta og katarungan sa nasud human ang pagkamatay sa Supreme Leader nga si Ayatollah Ali Khamenei.
Mahinumdumang napatay si Khamenei niadtong Sabado sa usa ka joint airstrike operations sa Israel at Estados Unidos sa Tehran.
Gikumpirma sa Iranian state media ang iyang pagkamatay niadtong Domingo nga naghatud og protesta ug pagbangotan sa Iran ug sa ubang nasud.
Managlahi usab ang reaksyon sa pipila ka lider sa kasadpan diin gitawag ni U.S. President Donald Trump si Khamenei nga usa sa pinaka-daotan nga tawo sa kasaysayan ug gitumbok ang iyang pagkamatay isip higayon alang sa mga Iranian nga mabawi ang ilang nasud.
Samtang giaghat ni Israeli Prime Minister Benjamin Netanyahu ang mga Iranian nga magkahiusa batuk sa rehimen.
Sa pikas bahin sa Tehran, milanog ang palakpakan ug singgit sa mga kadalanan sa dihang migawas ang taho mahitungod sa pagkamatay ni Khamenei, samtang dunay makitang itom nga aso sa lugar diin siya nagpuyo.
Sumala sa Israeli Defense Forces (IDF), si Khamenei ang utok sa mga operasyon batuk sa Israel ug gitawag siyang ”head of the Iranian octopus,” nga dunay dakong impluwensya matud pa sa Middle East.
Isip tubag, gitukod sa Iran ang tulo ka miyembrong interim Leadership Council aron dumalahon ang nasud hangtud sa makapili og bag-ong Supreme Leader.
Gitahasan si Alireza Arafi, 66 anyos nga cleric ug miyembro sa Guardian Council, isip jurist member sa konseho.
Kauban niya sa pagdumala sila President Masoud Pezeshkian ug Chief Justice Gholamhossein Mohseni Ejei aron kuptan ang katungdanan sa supreme leader samtang nagpaabot og permanenteng kapuli.
