BUTUAN CITY – Nahatagan na og relief packages sa mga personahe sa City Social Welfare and Development kon CSWD ning siyudad sa Butuan ang mga pamilyang na-apektuhan sa sunog sa parte sa Salvador Calo St. sakop sa Purok 8, Brgy Obrero, ka-uban sa pag-assist sa mga purok officials ug mga barangay workers.
Kini samtang nagpadayon ang imbestigasyon sa hinungdan sa sunog diin gitu-uhang nagsugod sa usa ka vulcanizing shop.
Sa eksklusibong pakighinabi ning sibyahan, gibutyag ni Fire Senior Inspector Ronald Vasquez, ang fire marshal sa Butuan City Fire Station, nagpadayon pa ang ilang overhauling operations ug wala pa kini pormal nga konklusyon.
Giplano usab sa BFP nga makigsabot sa tag-iya ug mga trabahante sa vulcanizing shop, lakip ang mga kasikbit nga establisyemento, aron mahibal-an kung kinsa gyud ang nakakita sa aktuwal nga pag-ulbo sa kalayo.
Dugang ni Vasquez, pito ka mga istruktura ang na-apektuhan sa sunog.
Gihuwat pa niya ang final report sa assessment ug ang pamahayag sa mga posibleng nakakita sa aktwal nga pagsugod sa kalayo.
Gihangyo usab niini ang publiko nga magmatngon ug mag-amping aron malikayan ang susamang insidente.
