BUTUAN CITY – Miresulta sa kamatayon sa target suspect nga purok president ug membro sa Communist Terrorist Group ang pag-serve sa mga sakop sa Police Regional Office (PRO) 13 ug Philippine Army og search warrant sa Surigao City kagahapong adlawa.
Gibutyag ni Police Regional Office kon PRO-13 regional director BGeneral Romeo Caramat Jr., i-serve na unta sa hini-usang pwersa sa Surigao City Police Station, 1st Surigao del Norte Provincial Mobile Force Company, 901st Infantry Brigade ug 29th Infantry Battalion sa Philippine Army ang search warrant ngadto kang Ignacio Arevalo alyas Tukoy, 59 anyos, residente ug presidente sa Purok-13, Brgy. Mat-i, Surigao City.
Dihang nakita niini ang mga otoridad, gipabuthan gilayon ang operating troops rason sa pagbalos sa tropa nga miresulta sa kamatayon sa suspek.
Sumala ni BGeneral Caramat, si Arevalo ang presidente sa Nagkahiusang Ginagmay’ng Minero (NAGAMI), kinsa nasutang membro usab sa Communist Party of the Philippines-New People’s Army kon CPP-NPA Mass Union Organization (CAMO) ug gika-ingong membro usab sa Guerilla Front 16B, Northeastern Mindanao Regional Committee.
Narekober atol sa operasyon ang usa ka unit sa MKN Colt .45 caliber pistol nga adunay usa ka magazine, upat ka buhing bala ug laing duha ka basiyo niini, ug usa ka hand grenade, 4 ka gitira na nga cartridge cases sa 9mm nga pistola; tag-usa ka basiyo sa 9mm, improvised electrical wire, improvised black switch ug improvised C4.
Samtang anaa na sa kilometro gikan sa dapit nga nahitabuan, gipa-ulanan pa og mga bala ang tropa sa kagamhanan nga pa-uli na unta rason sa 15-minutos nga binakbakay kondiin wala’y casualty sa panig sa gobyerno.
