BUTUAN CITY – Duna na’y lead nga gipanubayan ang kapulisan sa Santiago, Agusan del Norte kalabot sa pagpusil-patay sa ilang ka-ubanang si SPO3 Riel Morgado pasado alas-8:30 kagabii.
Sa eksklusibong pakighinabi ning sibyahan, gibutyag ni Santiago Municipal Police Chief Insp. Ralph Alexis Avenido nga diha matud pa sulod sa ilang pinuy-anan sa Brgy. Hagupit ang maong pulis dihang duna’y nangita kaniya.
Dihang gibuksan matud pa sa maong police officer ang ilang gate, dinhi na siya gipusil sa riding-in-tandem suspects sa pila ka higayon dayong sibat padulong sa wala pa masutang direksyon.
Gidala pa kini sa Cabadbaran District Hospital apan gideklara na kining dead-on-arrival sa attending physician.
Samtang gibutyag ni P/Supt. Christian Rafols – tigpamaba sa Police Regional Office kon PRO-13 sa base sa imbestigasyon, ang rebeldeng New People’s Army kon NPA ang gidudahang mihimo niini.
Kini tungod na usab sa mga tawong iyang gikasuhan nga posibleng konektado sa maong grupo ilabina kadtong milambigit sa small-scale mining. (Beth Ruiz)
