BUTUAN CITY – Nag-trending sa social media ang hulagway sa 16 ka mga magbarkada kinsa dungan nga ni-graduate sa Father Saturnino Urios University ning siyudad sa Butuan tungod kay pareho silang mitapos nga cum laude sa kursong BS Accounting Technology.
Sa eksklusibong pakighinabi sa Bombo Radyo Butuan kang Rhodney Tabaranza, usa sa mga magna cum laude, gibutyag niining inspirasyon nila ang matag-usa diin tinguha lang nila nga makahuman sa maong kurso kondiin ang motibasyon nila sa pagtuon anaa sa pagtinabangay sa matag-usa.
Giklaro ni Rhodney nga 15 lang silang nakakuha ug Latin honors kondiin usa ang summa cum laude, 8 ang magna cum laude ug 6 ang cum laude.
Nakab-ot matod pa sa usa nila ka higala ang average grade apan tungod kay gikan na kini sa laing kurso hinungdan nga wala kini -miqualify rason nga nagpabuhat na lang sila ug susama sa ilang medalya alang sa ilang higala.
Dugang pa ni Rhodney, puntirya nila nga wala’y mabiyaan sa ila nga mga managhigala ilabina nga daan na silang mag-classmates sa high school sa Agusan National High School kon AHNS ning siyudad sa Butuan.
Sa pagkutlo niini nga balita, anaa na sa 52-mil ang nag-like samtang 17-mil ang nag-share sa ilang graduation picture nga gi-post ni Jay-r Plaza kansa dunay caption nga ‘SQUAD GOALS’. (Melody Valledor)
