BUTUAN CITY – Mitumaw sa bag-ong survey nga gihimo sa Philippine Statistics Authority nga ang mga Pilipino karon adunay pinakagamay nga gidaghanon sa mga anak, sunod sa padayon nga pagkunhod sa national fertility rate.
Base sa 2025 National Demographic and Health Survey, natala ang total fertility rate nga 1.7, mas ubos kumpara sa 1.9 niadtong 2022 ug 4.1 niadtong 1993.
Mas ubos usab kini sa 2.1 nga minimum aron masustiern ang populasyon bisan og walay migration.
Ang Calabarzon ang dunay pinakadako nga pagkunhod sa fertility rate, gikan sa 1.8 ngadto sa 1.3—nga mao na sab ang pinakagamay sa tanang rehiyon.
Misunod ang National Capital Region ug Negros Island Region nga pareho nakarekord og 1.4 nga rate.
Samtang ang Bangsamoro Autonomous Region in Muslim Mindanao (BARMM) gihapon ang adunay pinakataas nga rate nga 2.4, bisan og mikunhod kini gikan sa 3.1 niadtong 2022.
Nahibaloan usab nga sa maong survey, giinterbyu sa Philippine Statistics Authority ang 29,694 ka kababayen-an nga nag-edad og 15 hangtod 49 sa tibuok nasod, nga naglangkob sa panahon gikan 2022 hangtod 2025.
