BUTUAN CITY – Ningkabat sa balor 1 trillion won kon US$740 million nga shabu ang nakuha sa mga otoridad sa South Korea sa Norwegian-flagged bulk carrier M/V Lunita, kansa mao na ang natalang pinakadakong drug bust sa kasaysayan sa maong nasod.
Subay niini, gikumperma usab sa tag-iyang kompanya sa maong barko nga J.J. Ugland Companies nga lakip sa mga crew niini kay mga Pilipino.
Sa kasamtangan, nagpabilin pa gihapon ang nasangpit nga mga crew sa maong barko samtang nangita pa og abogado ang kumpanya nga makatabang sa nasangpit nga mga crew.
Kahibaloang ning-abot sa Okgye, South Korea ang maong cargo vessel niadtung Abril 4 ning kasamtangan nga tuig, kanus-a nasakpan sa mga otoridad ang tone-toneladang mga shabu nga naka tago lang sulod niini.
Kasamtangan na usab nga gihimo ang imbistigasyon aron sutaon kung giunsa pagsulod sa maong mga drugas sa barko.
Sayrang regular ang operasyon sa M/V Lunita kansa bag-o pa lamang ning libot sa mga nasod sama sa Mexico, Ecuador, Panama, China, ug South Korea.
