BUTUAN CITY – Walay katingalahan ang pagbutang og gatas o cream sa kape, pero sa amihanang Sweden, lahi ilang gusto i-partner sa kape – keso kon cheese.
Ang kaffeost usa ka kombinasyon sa init nga kape ug usa ka espesyal nga bread cheese. Bisan pa sa ngalan, walay pan nga sagol ani tungod kay keso ug kape ra gayud.
Ang keso dali mosuyop sa kape, mao nga dali ra kini makapalami sa kape bisan pila lang ka minuto ibabad.
Ang bread cheese mas tam-is kaysa sa kasagarang keso, mao nga kung ibutang sa kape, murag nagbutang ka og gatas o cream ug asukal. Ang kaffeost dugay na nga parte sa kultura sa mga tigbantay og reindeer sa amihanang Sweden ug Finland.
Nakatabang kini sa kakulang sa asin sa lawas, samtang ang init nga kape naghatag og kainit ug kusog sa bugnaw nga panahon. Bisan og murag dili bagay ang kape ug keso alang sa uban, sa Scandinavia, nagkadaghan ang ganahan sa kaffeost.
Daghang coffee shops karon ang nag-offer ani, uban sa lain-laing klase sa keso gikan sa baka o kanding, gawas sa tradisyonal nga gikan sa reindeer.
Ning mi-aging bulan, gihatagan sa European Union og espesyal nga proteksyon ang kaffeost aron mapreserbar ang ilang tradisyonal nga pagkaon ug makadani pa og mas daghang coffee lovers sa ilang lugar.
