BUTUAN CITY – Mikuha ug atensiyon ang gihimung kasal sa Barangay Gamut, Tago, Surigao Del Sur tungod sa talagsaon og pinasahe niini nga tema.
Makita niini ang kinasal nga sila Genelyn Burbano Pelenio ug banang si Christian nga nagsakay sa bridal nga car nga mao ang karomata nga gidayan-dayanan og giguyod usab sa kabaw.
Daw gi-atangan sa katawhan ang pag-gawas sa bridal car gikan sa ba-ba sa simbahan. Ang kabaw nga dunay sakay pang bata, giguyod sa usa ka lalaki samtang sa karomata nga dunay puting dayan-dayan, nakasakay ang bag-ong magti-ayon.
Sa eksklusibong pakighinabi sa Bombo Radyo kang Genelyn, giklaro niining tumong sa maong pinasaheng pamaagi nga mabutang sa huna-huna og dili malimtan nga mga maguuma ang ilang giginakan.
Nasayran nga ang bag-ong gikasal parehong mga Overseas Filipino Workers kon OFW diin ang babaye sa Malaysia samtang ang lalaki usab sa Jeddah.
Nagkaila ang mga niini diha sa social media diin sila nagkauyab.
Paglabay sa 2 ka tuig nagkita ang duruha ug niadtong higayona namalayi na ang lalaki samtang paglabay sa laing 2 ka tuig, nagdisesyon na ang mga niini nga magpakasal.
