BUTUAN CITY – Gikonsidera sa Pilipinas ang pag-angkat og lana gikan sa Russia isip kabahin sa pagpangita og bag-ong mga tinubdan sa suplay sa fuel, sumala sa Department of Foreign Affairs (DFA).
Kining lakanga gituyo aron mapakunhod ang lokal nga presyo sa lana ug masiguro ang suplay, samtang 98% sa krudo sa nasud karon naggikan sa Middle East, nga naapektuhan sa gubat tali sa US, Israel ug Iran.
Gitan-aw sa gobyerno ang Russia isip potensyal nga supplier aron mapaminusan ang presyo sa petrolyo sa merkado.
Sumala usab kang Energy Secretary Sharon Garin, nakig-ugnayan na ang ginadumala sa estado nga Philippine National Oil Company (PNOC) sa Russian oil, apan wala pa matalakayi ang mga detalye bahin sa posibleng gidaghanon o kadugayon sa suplay.
Sa pagkakaron, sumala sa kalihim, naghulat pa sa tubag sa Russia.
Gawas niini, nakig-ugnayan usab ang nasud sa ubang exporters sama sa Thailand, Japan ug Singapore aron masiguro ang igo nga suplay samtang nagpadayon ang kalibog sa presyo sa pandaigdigang merkado.
