BUTUAN CITY – Mi-apela si Villa Kananga, Butuan City Brgy. Captain Venusto Clarito ngadto sa lokal nga kagamhanan nga unta wagtangon na ang mga pick-up points alang sa labayanan og mga basura sa nagkada-iyang urban barangays ning siyudad.
Kini tungod kay mao matud pa kini ang hinungdan sa magtapun-og nga mga basura hinungdan nga hugaw tan-awon ang siyudad.
Gani, sa ilang tigom sa 43 ka mga service barangays, iya na kining gihisgutan aron masubay ang gigikanan niini nga balaud, lokal man o nasyunal sa ingon mas matun-an pa og maayo.
Base sa inisyal nilang panaghisgot, nasuta nga component matud pa kini sa Materials Recovery Facility kon MRF kansa angayang tun-an og maayo sa lokal nga kagamhanan kung tinguha niini ang limpyong dagway sa dakbayan.
Gidugang ni kapitan Clarito nga dili matud pa angayang mabasol sa lokal nga kagamhanan ang mga barangay sa nagtapun-og nga basura sa mga pick-up points tungod kay wala matud pa gitunundo ang pagkuha niini.
Dili matud pa angayang basulon ang mga barangay officials niini tungod kay kung dili makuha sa mga basurero ning siyudad ang mga basurang nagtapun-og na sa mga pick-up points, wala sila’y malabayan niini. (Beth Ruiz)
