BUTUAN CITY- Nabayran na sa Philippine Health Insurance Corporation kon PhilHealth ang 98.74% sa unang hugna sa mga claim ubos sa Yaman ng Kalusugan Program (YAKAP) alang sa 2026, sumala sa public advisory nga gipagawas niadtong Lunes.
Ang YAKAP, nga maoy gi-rebrand ug gipalapdan nga bersiyon sa kanhi “Konsulta” primary care package, naggamit sa capitation payment model diin ang mga accredited clinic makadawat og takdang tinuig nga pondo matag rehistradong pasyente imbes nga bayran kada konsultasyon.
Aron masiguro ang lig-on nga cash flow sa mga community clinic, gibahin sa duha ka hugna ang pagpagawas sa pondo, diin ang unang tranche nga bugti sa 40 porsiyento awtomatikong ma-aktibo human sa unang konsultasyon ug pagpirma sa empanelment slip sa pasyente, samtang ang nahibiling 60 porsiyento ipagawas base sa nahuman nga konsultasyon, laboratory results ug mga reseta.
