BUTUAN CITY- Nagpahimangno ang Philippine Health Insurance Corporation (PhilHealth) sa tanang miyembro nga adunay kapilian nga makagamit sa mga benefit package alang sa mga sakit nga adunay kalabutan sa kainit sa panahon.
Sumala sa ahensya, ang mga pasyente nga ma-admit sa mga accredited nga ospital sa tibuok nasud mahimong makadawat og pinansyal nga tabang aron maminusan ang gasto sa bulsa.
Lakip sa mga benepisyo mao ang P12,675 alang sa heat stroke, heat exhaustion, heat collapse, heat cramp ug sunstroke; P18,135 alang sa heat fatigue ug uban pang epekto sa init ug kahayag; ug P7,800 alang sa kasarangan hangtod grabe nga dehydration. Anaa usab ang P7,800 alang sa varicella/chickenpox nga walay komplikasyon, P19,500 sa typhoid fever, P16,575 sa sore eyes/conjunctivitis, P11,700 sa infectious diarrhea/acute gastroenteritis, ug P11,115 alang sa toxic effect gikan sa kontak sa isda ug ubang marine animals sama sa jellyfish ug shellfish.
Gipahinumdom usab sa PhilHealth nga sakop sa Outpatient Emergency Care Benefit Package ang mga health emergency nga adunay kalabutan sa kainit. Matod pa ni PhilHealth President ug CEO Dr. Edwin Mercado, andam ang ahensya sa pagpanalipod sa tanang Pilipino pinaagi sa pagseguro nga magpabiling available ang mga benepisyo bisan asa ug bisan unsang panahon.
