BUTUAN CITY – Padayon ang pagpangita karon sa Philippine Health Insurance Corporation kon PhilHealth og mga parmasya nga ma-accredit nila sa gilusad niadtong Agusto 21 sa tibuok nasud, nga PhilHealth Guaranteed and Accessible Medications for Outpatient Treatment kon GAMOT program.
Usa kini ka komprehensibong drug benefit package ubos sa PhilHealth Yaman ng Kalusugan kon PhilHealth YAKAP Program.
Sigon ni Dr Pinky Espelimbergo, medical specialist IV sa PhilHealth-Caraga, ubos niini nga programa, ang mga tambal na ang gi-cover kansa makuha sa mga parmasya sukwahi niadtong wala pa ang programa nga sa ospital makuha ang mga tambal.
Ubos sa maong programa, ang matag-membro sa ilang ahensya, gigahinan og hangtud sa ₱20,000 nga balor sa free outpatient medicines matag-tuig.
Cover niini ang 75 ka mga essential medicines, apil na kadtong mga tambal alang sa hypertension ug heart disease, diabetes, asthma ug COPD, high cholesterol, infections ug mga nervous system disorders.
Apan giklaro ni Dr Espelimbergo nga maka-avail lang niini nga programa ang mga membro sa PhilHealth o kaha ilang mga dependents, kung nakaparehistro na sa YAKAP provider nga kaniadto mao ang KUNSULTA Provider.
Kung duna matud pa’y ipa-check up nga balatian sa YAKAP provider diin ka narehistro, ang resita nga ihatag sa doktor, didto na dalhon sa parmasya nga accredited sa PhilHealth GAMOT program.
