BUTUAN CITY – Giklaro ni P/Sr. Supt. Francisco Dungo – director sa Surigao del Sur Police Provincial Office, nga ang person of interest sa pagbanhig-patay sa radio anchor nga si Christopher Lozada sa Bislig City, nakasuhan na apan dili tungod sa pagpatay sa maong komentarista.
Sa eksklusibong pakighinabi ning sibyahan, gibutyag sa opisyal nga niadtong Nobyembre ning mi-aging tuig, gi-search nila ang pinuy-anan ni Rolly Mahilom kondiin nakuha ang pipila ka mga armas og mga bala hinungdan nga nag-atubang na kini og kasong illegal possession of firearms and ammunition.
Gihulat na lang nila ang pagpagawas og arrest warrant gikan sa korte aron masugdan gilayon nila ang manhunt operation sa nagpabiling at large nga suspetsado.
Gipasabot sa opisyal nga dili murder ang napasakang kaso batuk kang Mahilom tungod kay kulang pa sila og mga ebidensya.
Alayon sa maong kalambuan, magpahigayon na usab sila og case conference aron makuha ang dugang pang mga kalambuan sa ingon ang bag-ong lead ilang madugang sa update sa kaso.
Giklaro ni Supt. Dungo nga dili sila basta-basta makapasaka og kaso batuk ni bisan kinsa kung huyang ang ihatag nga ebidensya. Kini ang giklaro sa opisyal tungod sa nanggawas nga mga espekulasyon tungod lang sa pipila ka mga sirkumstansya sama sa pagkasuod ni Mahilom kang Bislig City Mayor Librado Navarro kinsa maoy gitudlong utok sa pagpapatay matud pa kang Lozada.
Aminado si P/Sr. Supt. Francisco Dungo – director sa Surigao del Sur Police Provincial Office nga kinahanglan pa nila ang mas lawom nga imbestigasyon sa maong kaso aron mapanubag na ang responsable sa nasangpit nga kremin. (Beth Ruiz)
