BUTUAN CITY – Gipangunahan ni Pangulong Ferdinand Marcos Jr. ang pagpanumpa sa katungdanan sa mga bag-ong napiling opisyales sa Kapisanan ng mga Brodkaster ng Pilipinas (KBP) sa seremonyang gihimo sa Malacañang Palace kagahapon.
Subling gipaniguro ni Pangulong Ferdinand Marcos Jr. ang saad sa iyang administrasyon nga protektahan ang mga tigbalita.
Gipa-ila ila ang KBP Board of Trustees nga gipangunahan nila Chairman Herman Basbaño ug President Ruperto Nicdao Jr., apil na ang KBP Standards Authority ilalom sa kadumalahan ni Chairman Enrico Canoy, isip paghatag og importansya sa katungdanan sa grupo nga maoy self-regulatory body nga magmintina sa etikal nga sumbanan sa broadcasting.
Sa iyang mensahe, gihatagan og importansya niini ang dakong papel sa media sa pag-asdang sa kamatu-uran, pagpanubag ingon man serbisyo publiko, dungan sa pag-angkon nga nagpabiling delikado ang palibot alang sa mga tigbalita sa Pilipinas.
Gidayeg usab ni Pangulong Marcos ang mga bag-ong opisyal sa Kapisanan ng mga Brodkaster ng Pilipinas (KBP) ug gipaniguro ang paghatag og dugang proteksyon alang sa pagpalig-on sa demokrasya.
Angayan matud pang tamdan sa media ang importanteng papel sa paghatud sa sakto ug responsableng impormasyon, samtang gi-ila ang kadelikado ug hulgang gi-atubang sa mga tigbalita.
