BUTUAN CITY- Dili exempted si Pres. Ferdinand Marcos, Jr. sa probisyon sa 2026 General Appropriations Act (GAA) kansa nagbawala sa presensya sa mga pulitiko sa pagpang-apod-apod og mga hinabang sa panggamhanan sa publiko o anti-epal provision.
Sumala ni Palace Press Officer at Communications Usec. Claire Castro, nga gimandanon dayon ang Department of Social Welfare and Development (DSWD) nga tanggalon ang tarpaulin nga adunay hulagway sa Presidente, diin na diskubrehang nakapilit sa usa ka payout center, kung asa gipanghatag ang cash relief assistance sa mga PUV driver naga apektado sa taas nga presyo sa lana.
Gipahimangnoan usab sa Palasyo ang mga lokal nga panggamhanan sa maong probisyon sa balaod, nga dili gamiton o pahimuslan ang mga payout activity sa gobyerno, aron angkunon ug ipalambo ang ilang mga personal nga interes ug pamolitika.
Gipasiugda ni Castro, nga taliwala niini, importante usab matud pa nga masayran sa katawhan ang mga programa sa Presidente, isip pahinumdum nga aktibong ming-aksyon ang Presidente sa mga panginahanglanon sa publiko taliwala sa minggrabe nga sitwasyon.
