BUTUAN CITY – Naka-abot na kaganinang hapon ang patay’ng lawas ni 1st Lt. Mike Tuesday Tabigne, kinsa usa sa upat ka mga namatay sa pagkahagsa sa Huey Helicopter sa Tactical Operations Group 2 kon TOG sa Philippine Air Force didto sa Cauayan City ning miaging gabie.
Lulan sa abyon sa Philippine Air Force, malampusong na-turn over ang patay’ng lawas ni Tabigne ngadto sa misugat kaniyang mga ginikanan nga sila Anecito ug Susana Tabigne, residente sa Purok 9, Brgy. Los Angeles ning siyudad uban sa uban pang mga igsoon sa biktima.
Sigon sa inahan sa biktimang si Susana, ning mi-aging gabii pa lang dihang gipahibalo na sila sa mga opisyal sa Philippine Air Force sa nadangatan sa iyang anak, gi-andam gilayon nila ang ilang pinuy-nan alang sa patay’ng lawas niini.
Sa eksklusibong pagkighinabi sa Bombo Radyo Butuan, gipadayag ni Susana nga grabe ka positibo ang panglantaw sa kinabuhi sa iyang anak nga mahimong piloto kondiin wala nahimong babag ang kalisod sa ilang kinabuhi, makahuman lang og makab-ot ang iyang tinguhang mahimong piloto.
Dugang pa ni Nanay Susan daghan pa og pangandoy sa kinabuhi ang mitaliwang anak kinsa hingpit paghigugma niini ngadto kanila tungod kay wala’y laing pangandoy niini, kondili maharuhay lang ang ilang kinbuhi.
Gipalitan pa ni Mike og multicab ang iyang amahan isip regalo sa iyang adlaw’ng natawhan ug plano pa usab unta niining mopalit og yuta aron adunay silay kalingawan ang amahan niining usa kamananggiti.
Nasayrang usa ka lisensyadong mgtutudlo si Mike kinsa mikuha gilayon og Officer’s Candidate Soldier kon OCS ug natapos niya sulod sa usa ka tuig ug tunga og mipadayon pagtungha pagka-piloto sa Lipa City sa Batangas.
Katapusan nilang pagkita sa ilang anak niadto pang Disyembre ning miaging tuig dihang mipa-uli kini.
Madumdumang, magpahigayon unta og night vision proficiency training ang mga membro sa TOG 2 sa Philippine Airforce dihang natigayon ang insidente nga miresulta sa pagkamatay sa upat ka mga sakay niini ug usa ang grabehang na-angol.
