BUTUAN CITY- Mingsaka na sa 81 ang ihap sa mga namatay sa ming-igo nga linog sa Mindanao niadtong Hunyo 8, samtang 31 ka-tao ang nagpabiling missing, base sa pinakabag-ong situational report nga gipagawas sa National Disaster Risk Reduction and Management Council (NDRRMC).
Anaa sa kinatibuk-ang 1,315 ka-tao usab ang gitahong na-angol apan, sumala sa ahensiya, gipailawom pa sa validation ang kadaghanan sa mga natahong casualties.
Gitaho usab sa ahensiya nga ming-abot na sa kapin 380,000 ka pamilya o 1.63 milyon ka indibidwal ang apektado sa kapin 600 ka barangay sa Region IX, XI, XII, ug Bangsamoro Autonomous Region in Muslim Mindanao (BARMM).
Sa mga apektado sa miaging linog, kapin 89,000 ka indibidwal pa gihapon ang displaced kung asa kapin 23,000 ka-tao ang nagpabilin sa mga evacuation center samtang adunay kapin 63,000 ka indibidwal usab ang temporaryong nakipuyo sa ilang kabanay ug higala.
Sa damage assessment, ming-abot na sa kapin 87,000 ka panimalay ang naguba lakip na ang totally damage ug partially damage.
Minghapak na usab sa P1.356 billion ang kantidad sa damyos sa sektor sa imprastruktura sa mga rehiyong na-igo sa linog.
Subay niini, padayong gipa-ilawom sa state of calamity ang kinatibuk-ang 18 ka siyudad ug munisipalidad.
