BUTUAN CITY – Mi-abot lang sa 5-mil pesos ang gibana-banang damyos human daling napatay ang mikaylap nga kalayo sa panghaw nga bahin sa Ramos Lechon House sa may R. Calo St. sakop sa Sikatuna ning siyudad sa Butuan.
Kini tungod na usab sa pagtinabangay sa mga anaa sa maong establisamiento dihang mi-ulbo ang kalayo pasado alas-11:45 kaganinang sayo sa udto.
Sigon ni SFO4 Guillermo Abarquez sa Bureau of Fire Protection-Butuan, nadawat nila ang fire call pasado alas-11:46 og naka-abot sila paglabay sa 3-minutos dayong kumbati pagpatay sa kalayo sulod lang sa usa ka minuto hinungdan nga na-fireout kini pasado alas-11:50 na ang takna.
Ang wala matud pa mamintinang paghinlo sa panghaw ang hinungdan sa pag-ulbo sa kalayo ilabina nga uwilon kini tungod sa gipanglutong litson manok.
Upat ka mga fire trucks ang miresponde sa sunog nga anaa lang sa first alarm ang status. (Beth Ruiz)
