BUTUAN CITY – Nagbangutan ang pamilya sa duha ka lalaking nakabsan sa kinabuhi human ang natigayong disgrasya sa kadalanan niadtong alas 4:00 sa kaadlawon sa nakalabay nga adlaw sa Purok 8, Barangay Capalayan, Surigao City.
Nasayran ang mga biktima pulos driver sa duha ka single motor nga nagsungag.
Naila ang mga niini nga sila si Monsor Beneros Leyran, 23 anyos, kauban ang backride nga si Leo Villason Leyran, 26 anyos, residente sa Purok 6, Brgy. Capalayan samtang ang driver sa ikaduha na motorsiklo mao si Angelo Brillo Cellona, 32 anyos, residente sa Purok 8 Upper, Brgy. Capalayan. Base sa inisyal nga imbestigasyon, padulong sa Brgy. Cabongbongan ang motorsiklo ni Cellona samtang padulong sa Purok 6, Brgy. Capalayan ang motorsiklo ni Leyran.
Pag abot sa lugar nga nahitaboan kalit nga misulod sa pikas linya ang motorsiklo ni Leyran nga miresulta sa head-on collision sa duha ka sakyanan.
Tungod sa kakusog sa pagkabangga, grabeng gubaa ang duha motorsiklo ug napatay ang duha ka driver samtang ang na-angol gidala sa Caraga Regional Hospital.
Nasuta pa sa imbestigasyon nga posibleng ubos sa impluwensya sa ilimnong makahubog ang duha ka driver atol sa nahitabong insidente.
