BUTUAN CITY– Gi-ampo karon sa pamilya sa namatay nga usa ka gidudahang COVID-19 patient sa Brgy. Libertad ning siyudad nga magnegatibo kini sa swab test. Kini tungod kung COVID positive ang namatay’ng ginang, ubay-ubay matud pa sila sa ilang compound ang ma-quarantine base na usab sa impormasyong gipa-abot kanila sa taga-Department of Health kon DOH-Caraga.
Sa eksklusibong pakighinabi sa Bombo Radyo Butuan, gibutyag ni alyas Mel nga niadtong Dominggo, nalipong ang iyang asawa nga mao na ang ikaduhang pag-atake sa iyang high blood pressure kinsa ilang gipahilot base na usab sa hangyo niini hangtud ng naluya rason nga dali nilang gidala sa Butuan Doctor’s Hospital kagahapon sa udto.
Wala na matud pa makatingog ang iyang 52-anyos nga asawa pag-abot sa ospital og dihang gi-atiman na paglabay sa usa ka oras, namatay na kini ug wala na nila makita pa human giputos pagkagabii tungod kay suspected COVID-19 case matud pa kini.
Tungod kay wala na gibalsamar sa gidalhan niining punerarya, kinahanglan na nila kining ilubong ning adlawa isip pagsunod usab sa quarantine protocol.
