BUTUAN CITY – Direktang gibasol sa pamilyang Kipkipan sa may Purok-5, Barangay Taguibo ning siyudad sa Butuan ang naghawid nga agency, sa kamatayon sa ilang kabanay nga Overseas Filipino Workers kon OFW nga si Jenerose Coscos Kipkipan.
Sa eksklusibong pakighinabi sa Bombo radyo Butuan sa manghud sa biktima nga si John Lester, gibutyag niini nga usa ka bulan palang nga anaa sa iyang amo sa Riyadh, Saudi Arabia, gikasakitan ang iyang igsoon.
Misumbong kini sa ilaha nga gibira matud pa ang iyang buhok og gidagmalan sa iyang among babaye. Duna pay insedente nga nadakin-as ang iyang biktima og gusto unta kining magpa-hospital tungod sa kasakit sa bat-ang apan gibalewala lang kini sa iyang amo.
Sumala pa ni John Lester nga mibutyag ang iyang igsoon nga gusto kining magpabalhin og amo diin gitawagan niya ang iyang agency apan wala kini mitubag hangtud nga silang pamilya gipahibalo na lang sa nadangatan sa ilang kabanay..
Una nang misinggit og hustisya ang pamilya tungod sa brutal nga kamatayon ni Jenerose Coscos Kipkipan, kinsa namatay tungod sa mga bun-og ug samad sa lawas nga na-angkon niini nga gitu-uhan nilang binuhatan sa iyang amo samang nagtrabaho sa Riyadh, Saudi Arabia.
Ang gikatingad-an pa sa pamilya tungod kay migawas sa death certificate nga normal death lang ang gikamatyan niini taliwa sa kadaghan sa mga samad ug bon-og sa lawas niini rason nga pursigido siyang mahatagan og hustisya ang nadangatan niini ilabina nga duna kini gibilin nga lima ka mga gagmay pang mga anak.
Misaad matud pa ang Overseas Workers’ Welfare Administration kon OWWA nga human sa lubong niini karong Dominggo, Septembre 27, sugdan na nila paghikay ang mga angayang atimanon aron makasuhan ang respnsable sa pagkamatay sa iyang kapikas.
