BUTUAN CITY – Nanawagan si Atty. Joseph Cuevas – provincial election supervisor sa lalawigan sa Lanao del Norte sa tanan nga dili una mag-speculate sa resulta sa plebisito alang sa pagratipika sa Bangsamoro Organic Law kon BOL sa ilang lalawigan.
Kini ang iyang reaksyon human nagpagawas og pamahayag si Moro Islamic Liberation Front kon MILF Vice Chirman for Political Affairs Ghadzali Jaafar nga midaog na matud pa ang ‘NO’ sa mga lungsod sa maong lalawigan nga girekomendang apil sa BOL.
Sa eksklusibong pakighinabi sa Bombo Radyo Butuan, gipadayag ni Atty. Cuevas nga dili angayang tu-uhan kung unsa man ang nanggawas karong mga hungihong tungod kay dili man kini opisyal.
Kinahanglan matud pang mabasa una niya ang resulta sa municipal canvassing tungod kay kini lang makasulti sa tinuod nga resulta sa maong plebisito.
Una nang gibutyag ni MILF Vice Chirman for Political Affairs Ghadzali Jaafar nga dili na kinahanglang i-assess pa niya ang resulta niini tungod kay midaog na matud pa ang ‘NO’ vote sa maong lalawigan.
Dili matud pa angayang pugson ang lugar nga dili gustongmupa-ilalom sa Bangsamoro government. (Bombo Beth Ruiz)
