BUTUAN CITY – Gi-angkon sa rebelding New People’s Army kon NPA ang gihimung pagtiro sa usa ka spray plane sa Sumifru banana plantation sa Surigao del Sur, nga gikamatay sa piloto niini.
Mahinumdumang niadtong Marso 18, adlaw’ng Domingo, milupad ang spray plane aron unta mag-spray sa kasagingan sa may lungsod sa Tagbina, Surigao Del Sur sa dihang gitirohan nga gikamatay sa piloto nga si Lynbert Laguda, 65-anyos, minyo, residente sa Arujville Subdivision sa Brgy. Libertad ning siyudad sa Butuan.
Sa usa ka pamahayag nga pinirmahan ni Ka Ariel Montero, tigpamaba sa Regional Operational Command sa NPA, gi-angkon niini nga sila ang responsable sa sa pagtiro sa spray plane nga usa ka pagsilot matud pa sa kompanyang Sumitomo Fruits kon Sumifro.
Ang maong pagsilot gihimu matud pa tungod sa padayon sa pagpangilog ogn yuta sa mga maguuma og lumad, pagpahimulos sa mga mamumuo og pagdaot sa kinaiyahan pinaagi sa paggamit og makahilong kemikal nga gisabwag sa aerial spraying ug boom spray sa ilang plantsayon.
Nagpaabot usab kini ug pahisubo sa pamilya og kabanay sa namatay nga piloto ug dayung pagtulisok nga ang maong kompanya ang angayang manubag sa iyang kamatayon tungod kay nahibalo na silang daan nga mabutang sa kakuyaw ang kinabuhi sa mga piloto ugaling dili muhonong sa ilang makadaot matud pa nga aktibidad.
