BUTUAN CITY – Gi-angkon mismo ni Kapitan Nestor Amora sa Barangay Banza ning siyudad sa Butuan nga bisan siya apektado sa paglanap sa tubig sa ilang barangay.
Sigon sa kapitan nga ang mga sitio sa Bagyangon, Lilo ug Galaxy sa iyang barangay, ang daling mabahaan bisan ug hinay lang ang pagulan.
Apan giklaro sa opisyal nga gipapahawa na sa ilang lokal nga kagamhanan diin gihatagan matud pa sila ug relocation site apan nagmagahi gihapon kini sa pagbiya.
Gipapirma na usab sila ug waiver sa pagpamatood nga ila nang kaakuhan ang unsay mahitabo kanila sa panahon sa baha.
Gibutyag usab ni Kapitan Amora nga dili niini mahimong ablihan ang flood gate tungod kay mas-ma-apektuhan hinoon ang tanang residente sa Barangay lakip na ang halos tanang basakan.
Tambag nalang niini sa mga residente nga mabutang sa peligro sa panahon sa pagsaka sa tubig sa Agusan river, nga isiguro ang mga kaugalingon pinaagi sa paghikling ug tas-an ang pailob ugaling dili gelayon mahatagan ug hinabang sa gobyerno tungod kay sayup naman kini kanila.
Samtang gipadayag usab ni Kapitan Amora nga dakong kantidad ang gikinahanglan sa lokal nga kagamhanan ning siyudad aron ma-relocate ang tanang residente nga anaa sa daplin sa suba.
Sumala pa niini, lisud nga ebalhin ang katawhan tungod kay nakapondar na kini sa ilang tagsa-tagsa ka dapit gawas pa sa paglambu na sa mga barangay.
Kung tinud-on matud pa kini sa pagpabalhin, nagkinahanglan sila ug dakong kantidad nga hangtud sa pagkakarun, wala pa sila nahibalo kung asa kini kuhaon nga pondo.
