BUTUAN CITY – Gi-angkon sa nagpailang Ka Otto, tigpamaba sa Guerilla Front Committee 16 sa NPA ang kamatayon sa usa ka sundalo sa Barangay Baliguian, Jabonga, Agusan Del Norte kagahapon sa buntag.
Sigon ni Ka Otto, gihapa-hapaan na nila ang patrol base sa 29Th IB nga anaa sa maong dapit aron unta atakihon.
Apan nakita sa ilang tropa ang usa ka sundalo nga si PFC Rolly Serelis nga mi-adtu sa hingway, hinungdang ila unta kining dagiton apan misukol matud pa kini rason nga napusilan-patay.
Kamatooran matud pa niini ang nakuha nilang .45 nga pistola isip side arm sa napatay’ng sundalo.
Gipasabot nalang niini sa katawhan ilabina sa kabanay sa nakalas nga sundalo, nga dili gayud malikayan ang mawala nga kinabuhi tungod sa nagtunhay nga civil war sa nasud.
Gikumpirma usab niini ang pagpang-snife nila kagahapon sa ala1:30 sa hapon sa may Barangay Hinimbangan, Kitcharao, Agusan Del Norte. Hinoon walay natala nga casualty sa maong kalihukan.
Subay niini, gipadayag ni Ka Otto nga unta pangusgan sa katawhan ang pagpabalik sa peace talks sa ingon mahisgutan kung nganung dunay nagtunhay nga civil war ug matuldukan ang kagubot sa nasud.
