BUTUAN CITY – Padayon karun ang hot pursuit operation sa kapulisan sa lungsod sa San Francisco, Agusan Del Sur batuk sa mga suspetsadong mipusil patay sa usa ka sundalo k kaganinang alas 11:30 sa buntag.
Sumala pa ni Police Supt. Bonifacio Estrella, Hepe sa San Francisco Municipal Police Station, dunay dalang cash nga 153-mil pesos ang magti-ayon nga gikan nag-withdraw sa bangko adiser nangaon sa usa ka carenderia sa karaang merkado sa may Barangay Poblacion sa maong lungsod sa dihang gisulayan ug tulis sa usa ka armadong lalaki.
Wala gihatag sa asawa ang dala niining kwarta og misulay sa pagtabang pagdepensa ang bana nga si Technical Sergeant Isabelo Mecabalo Paculba, miyembro sa 10th Infantry Division, Philippine Army apan gipusil kini sa suspetsado sa tulo ka higayon, diin lakip sa na-igo ang ulo niini, hinungdan sa iyang kamatayon.
Na-atol usab nga nagpatrolya ang beat patroller nga si SPO1 Urbiztondo hinungdang wala na milampos ang suspek sa pagtangag sa kwarta hinoon nakigpinusilay kini sa pulis.
Apan tungod sa kadaghang tawo sa lugar, naka-eskapo ang suspek sakay sa kauban niini nga naghulat lang kaniya, gamit ang single motor nga XRM color itom.
Pagbutyag pa ni Police Supt. Estrella, sa pag-review nila sa mga CCTV sa area, ilang nailhan ang namusil nga suspek nga gitoohang anaa pa sa lungsod tungod kay dili kini basta-basta makapalayu ilabina kay gipa-alerto na usab ang mga kasikbit nga police station og mga kasundaluhan.
Sa pagkutlo niining balita, anaa sa luwas nga kondisyun ang asawa sa napatay nga sundalo.
