BUTUAN CITY – Gikakurat sa mga magtutudlo sa Butuan City School of Arts and Trades kon BCSAT ang pagkalambigit sa Grade 12 student sa ilegal nga drugas.
Sumala ni Valentine Catuburan, principal sa senior high school sa maong tunghaan, walay bisan unsa mang bad record ang magtutungha nga si Mark Lingatong, 18-anyos, residente sa Barangay Bading ning siyudad ug Grade 12 student sa tunghaan sa kursong automotive mechanic.
Aktibo matud pa kini sa klase ug gamay lang ang absent samtang ang iyang work immersion, maayo usab ang assessment. Hinungdan nga hilabihan ang ilang katingala nga nadakpan kini sa buy bust operation diin 39 ka sachet sa shabu ang nakumpiska.
Sumala pa ni Catuburan, unang higayon kini nga nahitabo sa ilang eskwelahan.
Nabisita na usab nila ang mga ginikanan sa maong estudyante ug confidential matud pa ang ilang nahisgutan.
Alayon niini gipaneguro sa principal nga magpadayon ang ilan g mga symposium ug anti-illegal drug information drive. (Rolan Janea)
