BUTUAN CITY – Duda si Ferdinand Nakila, lumad nga taga-Cabadbaran, Agusan del Norte ug atua na nagtudlo sa California, USA nga makonbikto si kanhi US President Donald Trump sa gi-atubang niining impeachment case.
Sa eksklusibong pakighinabi sa Bombo Radyo Butuan, gipadayag niining nagkaguliyang na ang mga tawo sa Amerika ilabina sa social media partikular sa mga Republican states sama sa Arizona ug Texas tungod sa pagsugod na sa impeachment proceedings.
Kini tungod kay 2/3 sa boto gikan sa 100 ka mga senador ang gikinahanglan aron makonbikto ang kanhi pangulo.
Gibutyag niini nga sa unang adlaw sa pagtaral, mi-abot sa 56 ka mga senador ang mibotar sa constitutionality sa impeachment case kondiin sa maong ihap, unom niini ang mga kapartido sa kanhi Republican president nga gikasuko sa ilang mga ka-ubanan.
Sigon ni Nakila, 67 ang 2/3 sa 100 ka mga senador, nga maoy kinahanglanon aron makonbikto si Trump kansa posibleng dili matud pa makab-ot.
Hugot nga siguridad ang gipatuman palibot sa Capitol building sa Washington DC sa tinguhang dili na ma-usab pa ang nahitabo niadtong Enero 6 dihang gisulong sa mga Trump supporters nga miresulta sa riot ug pagkamatay sa 5 ka mga tawo apil na ang usa ka pulis.
Hugot matud pang gibarugan sa mga pro-Trumps ang dili na pagpadayon sa impeachment case tungod kay sibilyan na kini apan daghan usab ang mubarog nga kinahangang ipadayon kini aron dili na sundungon sa uban pang mamahimong lider sa maong nasud.
