BUTUAN CITY – Miapela og tabang sa katawhan si Barangay Libertad, Butuan City Kapitan Vincent Rizal Rosario aron mailhan ang responsable sa nakit-ang patay’ng lawas sa usa ka bag-ong himugso nga bata nga naglutaw sa tubig kilid sa Ambangan Kajima road sa maong barangay.
Base sa facebook post ni Kapitan Rosario, gipanawagan nila ang tanan nga dunay kahibalo o nakakita sa maong panghitabo nga e-report gelayon sa kapulisan o sa barangay aron ma-assess og matultulan ang mga tawong nagbuhat sa maong kremin. Gane makita sa video, nga naglutaw sa tubig ang batang bag-ong himugso nga duna pay pusod.
Sa pakighinabi usab kang Police Lt. Joy March Estioco, tigpamaba sa Butuan City Police Office nga gihulat nila karun ang otopsiya sa biktima aron masuta kung pila ka adlaw na kining patay.
Kini dayung butyag nga padayon ang gihimong lakang sa kapulisan aron mailhan ang mga responsable.
Nakig-alayon matud pa sila sa mga barangay health center bisan sa kasikbit nga barangay aron masuta kung duna bay nagpa-prenatal nga manganakay karun nga bulan. Samtang gisusi usab ang mga CCTV sa palibot.
