BUTUAN CITY – Gikasubo sa National Union of Journalist of the Philippines kon NUJP-Butuan City/Agusan del Norte Chapter ang pagdili sa usa ka reporter sa Rappler nga maka-sulod ug maka-cover sa press briefing nga gipahigayon sa Malacañan ning miaging adlaw.
Sa pakighinabi ning sibyahan, gibutyag ni Rodge Cultura, presidente sa nasangpit nga kahugpongan, usa kini ka makasusubo nga panghitabo sa nasud tungod kay makonsidera kini nga pagpangatake sa press freedom sa nasud.
Gikwestiyon usab niini kung kinsa ba gyud ang adunay gahum nga makasulti nga fake news ang usa ka balita o dili.
Gibutyag ni Cultura nga mamahimong itugyan na lamang ngadto sa gobyerno ang maong gahum tungod kay kinsa paman nga tigbalita ang makabarog kung ingon niini ang mamahimong sitwasyon.
Iyang gidugang nga kung gitugutan man ang mga blogger sa pagpasibaw sa ilang mga personal nga mga panglantaw mahitungod sa mga pamalakad karon sa gobyerno, wala’y rason nga pugngan nga makapasibaw usab ang mga lehitimong journalists nga adunay gisunod nga code of ethical standard sa paghimo ug balita.
Aduna na matud pa’y gipagawas nga official statement ang ilang National Executive Board sa NUJP mahitungod sa nasangpit nga panghitabo.
Hinuon, gitin-aw niini nga personal pa lamang niya nga opinyon ang iyang gipasibaw tungod kay wala paman gipagawas nga official statement ang local chapter sa NUJP.
Iyang gidugang nga usa kini ka dakong hagit ngadto sa mga tigbalita aron mubarog taliwa sa makonsiderang pag-atake ngadto sa media practice sa nasud. (Mon Aplaya)
