BUTUAN CITY – Sikop ang usa ka online bogus seller sa entrapment operation nga gilusad sa kapulisan ning syudad sa Butuan.
Gi-ila ni Police Brigadier General Joselito Esquivel Jr, Regional Director sa Police Regional Office kon PRO-13, ang suspek nga si Rogelio Guirit, sales agent ug residente sa Purok-8, Barangay Ampayon, ning siyudad.
Sumala pa, una nang gi-monitor si Guirit sa mga elemento sa Regional Anti-Cybercrime Unit 13 ug mga personahe sa Butuan City Police Station 1 human nagpatala ang usa ka Rocky Pia, 31 anyos ,minyo ug residente sa Eminville Subdivision, Barangay Ambago ning syudad, tungod matud pa sa modus sa suspek kinsa nagpa-ilang namaligya og cellphone online.
Nagpatabang ang biktima sa otoridad dihang dili na niini ma-kontak ang seller human kini nakahatag og advance payment. Giangkon sa suspek nga ang iyang amo nga naka-base sa Manila ug ang gi-order nga item andam na nga i-ship out o ipadala human mihatag ang buyer og 50% advance payment pinaagi sa remittance center.
Human sa maong entrapment operation nakumpiska gikan sa posisyon sa suspek ang usa ka itom nga Samsung S4 cellular phone, klase-klaseng ID’s , lahi-lahing remittance receipts, cash nga mukantidad og four hundred pesos, ug pitaka.
Temporaryong gikustodiya ang dinakpan sa Butuan City Police Station 1 samtang gihikay na ang kasong ipasaka batok niini nga paglapas sa Article 315 (Swindling) sa RPC in relation to RA 10175 (Cybercrime Prevention Act of 2012).
