BUTUAN CITY – Alang kang Butuan City Councilor Vincent Rizal Rosario – chairman sa Committee on Land Use, Zoning and Human Settlement Sa Sangguniang Panlungsod, mahinungdanon nga perfect kanunay ang attendance sa mga membro sa konseho atol sa ilang regular session tungod kay kini ang gikinahanglan diha sa pagpanday sa balaud.
Sa iyang kabahinan, duna’y sesyon nga wala siya makatambong tungod usab sa iyang official business nga mao ang pagtambong sa duha ka adlaw nga seminar sa Davao City kansa mahinungdanon sa iyang trabaho.
Sa iyang komite, usa sa iyang nahimo mao ang pagduso og ordinansa alang sa pagmontar og Office of the Building Official nga maoy venue alang sa pag-isyu og mga building permits.
Apil sa iyang tutukan base sa kamanduan ni Mayor Ronnievic Lagnada ang pagsustiner sa programang pabalay ning siyudad alang niadtong mga Butuanong wala pa’y kaugalingong pinuy-anan og wala’y yutang katukuran sa ilang balay.
Kada-semana usab, naggahin siya og adlaw aron awhagon ang mga Butuanon nga suportahan ang programa sa lokal nga kagamhanan alang sa housing program. (Beth Ruiz)
