BUTUAN CITY – Malinawon ug hapsay ang inisyal nga assessment sa Philippine National Police (PNP) bahin sa kinatibuk-ang obserbasyon sa Holy Week Exodus karong tuiga.
Sigon ni PNP Chief PGen. Jose Melencio Nartatez Jr., walay natalang dagkong insidente nga nakaapekto sa kinatibuk-ang pag-obserbar sa Lenten Season.
Dugang pa niini, nagpabilin nga prayoridad sa kapulisan ang luwas nga pagpauli sa mga biyahero human sa sobra usa ka semana nga ilang gigahin alang sa pagpamalandong.
Gipahibalo usab ni Nartatez nga isip pagpakita sa ilang paghatag og bili sa kaluwasan ug kahusay, magpabilin nga naka-deploy sa nagkalain-laing lugar ang hapit 98-mil ka miyembro sa PNP.
Gipakatag kini sa nagkadaiyang mga lugar nga ginabisitahan, mga transportation hubs, ug sa mga nag-unang dalan sa nasud.
Human niini, mipahimangno pag-usab ang hepe sa mga motorista nga magpabiling kalmado sa ilang mga biyahe ug likayan ang road rage incidents.
Samtang, magpabilin usab nga nakataas ang alert level sa PNP aron masiguro nga hapsay ug malinawon ang biyahe sa mga pasahero ug luwas silang makauli sa ilang panimalay.
