BUTUAN CITY – Subling gipangulipas ni Ka Sandara Sidlakan, nagpa-ilang tigpamaba sa rebeldeng New People’s Army kon NPA-Surigao del Sur ang balik-balik nga pagtumbok kanila nga maoy responsable sa pagdagit kang Tagbina, Surigao Del Sur Vice Mayor Antonio Adlao kinsa swerteng nakabalik sa iyang pamilya nga buhi.
Sa eksklusibong pakighinabi sa Bombo Radyo Butuan, gipamugos pa ni Ka Sandara nga wala silay kalabutan sa maong hitabo dayung akusa ngadto sa National Intelligence Coordinating Agency kon NICA nga tingali og sila ang duna’y kalambigitan niini.
Nagtoo si Ka Sandara nga basin dunay kalambigitan si JC Solomon, tigpamaba sa NICA-Caraga tungod sa pagpamugos pagpahid niini ngadto kanila.
Mamahimo matud pang dramahon lang kini sa maong ahensya aron masuta kung kinsa sa mga pulitiko ang mobayad gyud sa permit to win og permit to campaign.
Gawas pa kini sa lugar diin nakaplagan ang besi mayor nga dili ra halayu sa command post sa kasundaluhan.
Una nang gibutyag ni NICA-Caraga spokesperson JC Solomon nga wala’y laing grupong muhimo niini nga kalapad nga modus kondili ang mga NPA lang.
Kini ilabina nga niadto matud pang Marso 23, nakadawat na og sulat gikan sa grupo ang besi mayor nga nangayo kaniya og dakong kantidad aron makapadayon matud pa sa iyang kandidatura.
Gidugang pa sa opisyal nga sa mga election period lang makakwarta og dako ang NPA pinaagi sa pagpangayo og permit to campaign fee sa mga kandidatong mangampanya sa mga lugar ng gi-angkon nilang ilang balwarte.
Natural lang matud pa nga ipanghimakak kini sa mga rebelde aron ipakita sa katawhan nga tarong ang ilang pakigbisog.
Mas milig-on ang ilang pagtuo nga ang mga rebeldeng NPA ang midagit sa opisyal tungod kay wala kini kusog nga ka-atbang sa pulitika.
