BUTUAN CITY – Gi-andam na dugang ang kasong ipasaka batuk sa usa ka taas nga lider sa rebeldeng New People’s Army kon NPA human nasikop ning miaging adlaw.
Sa pakighinabi ning sibyahan, gibutyag ni Lt. Terry Indiente, tigpamaba sa 4th Infantry Division, PA, nga nadakpan sa hiniusang pwersa sa kasundaluhan ug kapulisan didto sa Purok 3 Brgy. El Rio, Sibagat, Agusan del Sur si Pablito Campos Jr., alyas “Ka Punsoy og Ka Batik, 43, taga- Sitio Han-ayan, Brgy. Diatagon, Lianga, Surigao del Sur.
Muabot na matud pa sa 20 ka tuig sa kalihukan ang nasangpit nga suspek kinsa nagsilbing front secretary sa Front Committee 21-A ug tigpamaba sa Sub-Regional Committee sa Westland sa North Eastern Mindanao Regional Committee (NEMRC) nga nag-operate sa Agusan del Sur..
Nakuhaan kini ug Bushmaster M4 rifle, usa ka fully loaded magazine, 3 ka cellular phones, 2 ka mga improvised Explosive Device, hand grenade og iyang mga personal nga gamit.
Nasayran usab nga daan nang nag-atubang ug walo ka warrant of arrest ang maong suspek para sa mga kasong rebellion, frustrated murder, murder, multiple attempted murder, kidnapping og serious illegal detention (Rolan Janea)
