BUTUAN CITY- Padayon ang imbestigasyon sa kapulisan sa natigayong pagpamusil-patay sa usa ka negosyanteng babaye sulod mismo sa tindahan niini sa Purok 10-A, Barangay Calamba, Cabadbaran City, Agusan del Norte.
Gipusil ang biktima nga si Jalyn Pioco, 47-anyos pasado alas-10:47 sa buntag sa nakalabay nga adlaw. Base sa imbestigasyon sa Cabadbaran City Police Station, samtang nag-atiman sa iyang sari-sari store ang biktima, mi-abot ang duha ka suspek nga nagsul-ob og color blue nga raincoat ug nagsakay sa usa ka itom nga motorsiklo nga walay plaka.
Gisangpit matud pa ang biktima rasong midool kini og dinhi na gipusil sa makadaghang higayon ug misibat gilayon ang mga responsible sa maong lugar. Wala pa matino sa kapolisan ang motibo sa krimen tungod kay gisusi pa nila ang tanang posibleng anggulo lakip ang personal ug negosyo nga mga kalabotan sa biktima.
Nagpadayon usab ang pagpangita sa mga suspek dayong hangyo sa publiko nga motabang pinaagi sa paghatag og impormasyon nga makatultol sa ilang pag-ila ug pagdakop.
