BUTUAN CITY – Miabot sa Kapin usa ka libo na ka pamilya ang anaa sa mga evacuation center sa tibook rehiyon sa Caraga tungod sa paghapak ni Bagyong Auring.
Sigon ni Eunice Montaos Plaza, Information Offcer sa Department of Social Welfare and Development kon DSWD-Caraga, miabot na sa 719 ka mga pamilya nga gilangkuban sa 2,292 ka indibidwal ang apektado sa bagyo sa Surigao Del Norte ug Surigao Del Sur.
Nadugang pa niini ang 14 ka pamilya o 81 ka indibidwal gikan sa Barangay Buhangin ning siyudad sa Butuan ang anaa karun sa evacuation center sa Agusan National Highschool samtang laing 64 ka pamilya usab gikan sa Barangay KM-3 ang namakwit ug kasamtangang anaa sa Sibayan Elementary School.
Giklaro usab ni Plaza nga dunay 6,100 ka family food packs ang naka-prepositioned sa mga strategic nga lugar ug naghulat lang kung dunay mo-request nga mga lokal nga kagamhanan.
Sa karun, nagpadayon usab ang ilang pag-impake nila ug family food packs isip pagpangandam na sa gilaumang pagtaas sa mga apektadong pamilya.
Naglihuk na usab ang quick response team aron magmonitor 24/7 sa tibook rehiyon dungan sa pakig-koordina sa Disaster Risk Reduction Management Council kon DRRMC.
Samtanga sa RTR, Agusan Del Norte, gikumpirma ni Erma Suyo, head sa Provincial Disaster Risk Reduction Management Council kon PDRRMC sa lalawigan nga 83 ka pamilya na gikan sa Barangay Panaytayon ang namakwit ug anaa karun sa municipal gym tungod sa taas na nga lebel sa tubig.
Samtang, miabot na sa halos 800 ka mga pasahero ang stranded karun sa nagkalain-laing pantalan sa area sa Surigao human gi-isa ang No Sail Policy tungod sa gihapon sa maong bagyo.
