BUTUAN CITY – Malampusong naguba kagahapon sa ginsakupan sa Department of TRade and Industry-Agusan Del Norte ang ubay-ubay nga mga produktong sub-standard didto sa covered court sa Barangay Doongan ning siyudad sa Butuan.
Gibana-banang muabot sa 31-mil pesos ang kinatibuk-ang mga gigubang produkto sama na lang sa mga rice cooker.
Sigon ni Atty. Kurt Montero, Chief sa Legal Division sa Department of Trade and Industry-Agusan Del Norte, ang nasangpit nga mga produktong gi-dispose o giguba, mao kadtong mga boluntaryong gisurender sa ilang buhatan human nasuta sa ilang regular monitoring nga kini mga sub-standard.
Sumala sa opisyal, delikado ang mga substandard nga produkto tungod kay posibleng sinugdanan kini sa sunog.
Gibutyag usab ni Atty. Montero nga ang mga sub-standard nga produkto mao kadtong walay ICC sticker o kaha PS Mark ilabina nga kinahanglang duna kini mandatory product registration apil na ang mga electrical products, construction supply og appliances.
Tambag na lang niini sa mga kunsumante, segurohong dili substandard ang mapalit nga produkto labi na karung nagkadool na ang pasko diin sagad mopalit og mga Christmas lights.
