BUTUAN CITY – Gikustudiya na sa kapulisan ang Ten Wheeler truck ug motorcycle nga dunay side car human kini nagsungag kagahapon sa alas 1:30 sa hapon sa may Purok-8, Barangay San Andres, lungsod sa Bunawan, Agusan Del Sur.
Ang maong aksidente mikalas sa duha ka sakay sa motorcycle nga sila Danny Manduna, 17-anyos nga mao ang drayber, estudyante nga taga Purok-6, Consuelo sa maong lungsod ug Meliton Castro, 18-anyos.
Sa impormasyong gipaabot ni PO3 Peter Obien, sa Bunawan Municipal Police Station sa pakighinabi ning sibyahan, nag-overshoot ang motorcycle nga dunay kargang krudo, sa likoong parte sa nahitaboan hinungdang mibangga kini sa kasugat nga wing van nga gikan sa Davao City ug padulong unta sa Tagbina, Surigao Del Sur.
Tungod sa kakusog sa panagsungag, dili tiaw ang nahiagum nga mga damyos sa kalawasan sa duha ka biktima nga gisulayan pa kini ug dala sa ospital apan gideklara kining dead-on-arrival.
Giklaro usab ni PO3 Obien nga andam nga makig-areglo ang drayber sa ten wheeler truck nga si Roniel Alyoso, 39-anyos nga taga Purok-16, Bodbod, Davao City.
Sa pagkutlo ning balita, gihulat pa sa kapulisan ang pamilya sa mga biktima aron masutang magpasaka ba kini ug kaso o makig-areglo na lamang.
