BUTUAN CITY – Trending karon ang gihimo sa mga animal rescuers sa Iowa human nagpagawas og hulagway sa usa ka ilo na nga piso kon wala’y inahan nga piso ug gihatagan og bag-o niyang inahan — dili manok kondili usa ka feather duster.
Sumala sa post sa Animal Rescue League of Iowa sa social media, ang piso gidala didto sa usa ka tawo nga nakakita niini nga naglatagaw nga nag-inusara duol sa Saylorville Dam.
Ang piso gidala sa Second Chance Ranch sa ARL, diin ang care team naningkamot nga mapahimutang ug mapakomportable kini.
Gibutangan nila kini sa enclosure nga adunay heat lamps ug feather dusters aron murag naa siya’y inahan nga manok.
Dihang ila kining gibutang ilalom sa feather duster, dali ra kaayo kini nasabtan sa piso ug dinhi na dayon siya magpa-ilalom aron magpainit.
