BUTUAN CITY – Padayon pang gisuta sa ginsakpan sa Butuan City Police Station kon BCPS-4 ang hinungdan sa pagpusil-patay sa riding-in-tandem suspects ngadto sa usa ka motorista kaganinang alas-6:40 sa sayong buntag sa Purok 3, Brgy. Taguibo ning siyudad sa Butuan.
Sa asuy ni Kapitan Rogelio Dumadag sa eksklusibong pakighinabi sa Bombo Radyo Butuan, gibutyag niining mihunong matud pa ang biktima dayong kuha sa cellphone tungod sa iyang katawag ug dinhi na miduol ang riding-in-tandem nga mga lalaking naka-helmet dayong pusil sa iyang agtag nga milapos sa iyang tangkugo ug gisigundahan pa sa duha niya ka mga abaga.
Posibleng ka-ila ra matud pa sa biktima ang mga responsable tungod kay wala mankini mudagan sa iyang pagduol. Gikumpirma usab sa kapitan nga nakuhaan og usa ka sachet sa suspected shabu ang biktima.
Human sa hitabo, daling misibat ang mga responsable padulong sa direksyon sa Cabadbaran City.
Dili matud pa taga-ilang barangay ang biktima rason nga nanawagan kini sa mga nawad-an og kabanay nga adtuon ang biktima sa usa sa mga punerarya ning siyudad sa Butuan.
