BUTUAN CITY – Gipirmahan na ang usa ka Memorandum of Agreement alang sa pagpananom ug mangrove sa usa ka barangay sakop sa lungsod sa Buenavista, Agusan del Norte.
Sa pakighinabi ning sibyahan, gibutyag ni Kapisanan ng mga Brodkaster sa Pilipinas kon KBP – Butuan City/Agusan del Norte Chapter President Engr. Romeo Zerrudo, nga ang nasangpit nga proyekto usa sa mga kalihukan sa KBP uban sa pakigtambayayong sa Department of Environment and Natural Resources (DENR), ug sa lokal nga panggamhanan sa maong lugar aron ma-proteksyunan ang kadagatan ingon man makahatag usab ug panginabuhian sa katawhan tungod kay mamahimo naman silang makapamaligya ug mangrove seedlings sa laing lugar.
Gituyo usab kini aron mamahimong ehemplo sa ubang mga kabarangayan ang pagbuhat sa susamang aktibidad.
Sunod matud pa nilang himuon mao ang pag-survey sa lugar ug dayon himuan na kini ug plano. Ang pamahayag ni Kapisanan ng mga Brodkaster sa Pilipinas ( KBP ) – Butuan City/Agusan del Norte Chapter President Engr. Romeo Zerrudo.
Samtang gibutyag usab ni Brgy. Sacol Brgy. Capt. Charito Doria nga mapasalamaton kini sa KBP nga ang ilang barangay maoy napili sa maong proyekto. Dako matud pa kini ug mahatag nga tabang ngadto sa ilang barangay hilabi na sa pagpadaghan sa produksiyon sa isdang tamban.
Lakip matud pa kini sa makatunol ug kalamboan sa ilang barangay ug makatabang usab sa mga mananagat. (Mon Aplaya)
