BUTUAN CITY – Nagduso og reklamong plunder ug graft ngadto sa Office of the Ombudsman si Atty. Mary Helen Polinar Zafra batuk kang kanhi Department of Public Works and Highways kon DPWH Undersecretary ug karon Surigao Del Sur 1st District Rep. Romeo Momo Sr, apil sa iyang pamilya ug uban pa kaganinang buntag.
Sa iyang pag-atubang sa mga tigbalita, gipadayag ni Atty Zafra nga duna kini kalabutan sa bilyunes pisos nga balor sa mga proyektong imprastraktura nga nakuha matud pa sa ilang family company nga Surigao La Suerte Corporation.
Ubay-ubay matud pa sa ilang lalawigan ang nagplanong mupasaka og kaso apan mi-atras ang uban tungod sa nadawat nga hulga sa kinabuhi kansa wala niya panumbalinga aron lang mahatag ngadto sa iyang mga tagi-lungsod ang pundo nga alang unta kanila apan wala napahimuslan.
Dismayado pa si Attu Zafra tungod kay membro man sa Bicameral Conference Committee kon Bicam ang kongresista nga apil sa mutuki sa 2025 General Appropriations Bill nga sugdan ugmang adlawa.
Emosyunal pa kining nagpadayag sa iyang kadismaya tungod sa padayon nga kawala’y asenso sa ilang lalawigan dayong bulgar sa mga establisamiento sa Tandag City nga sakop sa Surigao del Sur nga gipanag-iyahan matud pa sa pamilya Momo.
